१२ असार, २०७७
कान्तिपुर पब्लिकेसन प्रा.लि.ले आफ्ना तीन प्रकाशन बन्द गर्ने घोषणा गरेको छ ।
कोरोना महामारीलाई कारण देखाउँदै पब्लिकेशनले नेपाल साप्ताहिक, साप्ताहिक र नारी बन्द गर्ने घोषणा गरेको हो ।
शुक्रबार आफ्ना सहकर्मीसँग कुरा गर्दै नेपाल म्यागजिनका सम्पादक वसन्त बस्नेतले पत्रिका बन्द भएको जानकारी दिएका छन् । केही दिनअघिबाट कान्तिपुले आफ्ना केही सह–प्रकाशन बन्द गर्न लागेको हल्ला चलेको थियो । यसबारे माइसंसार डटकमले पनि ब्लग लेखेको थियो ।
कान्तिपुरको यो निर्णयले एक सय जनाभन्दा बढी पत्रकार प्रभावित हुनेछन् । यद्यपि, कतिपयलाई कान्तिपुर दैनिकमा समायोजन गर्ने तयारी गरिएको छ । योसँगै कान्तिपुरका केही पुराना पत्रकारको भने जागिर खोसिन सक्ने भनिएको छ ।
पछिल्लो समय यी तिनै प्रकाशन अनलाइनमा मात्र सीमित थिए ।
इतिहास
सन् १९९५ को मे महिनाबाट सुरु भएको साप्ताहिक युवा पुस्ता माझ लोकप्रिय पत्रिका हो । मनोरञ्जन क्षेत्रका गतिविधिलाई प्राथमिकता दिएर गैरराजनीतिक विषयलाई यो पत्रिकाले प्रस्तुत गर्दै आएको थियो ।
नेपालमा युवा लक्षित साप्ताहिक पत्रिका यो नै पहिलो भएको पब्लिकेसनको दाबी थियो । यो पत्रिका कान्तिपुर र काठमाडौं पोष्ट जस्तै काठमाडौं, भरतपुर र बिराटनगरबाट प्रकाशन हुँदै आएको थियो ।
यसका २० लाख पाठक भएको कान्तिपुरको दाबी थियो ।
नेपाल म्यागजिन सन् २००० बाट प्रकाशनमा आएको थियो । प्रारम्भमा हरेक पाक्षिकमा प्रकाशन हुने यो पत्रिकापछि साप्ताहिक रुपमा प्रकाशन गर्न थालिएको थियो ।
गहन खोज, अनुसन्धान र विश्लेषणात्मक रिपोर्टताजका लागि नेपाल साप्ताहिक लोकप्रिय थियो । यसलाई नेपालको सबैभन्दा बढी विक्री हुने म्यागजिन मानिन्थ्यो ।
कान्तिपुर पब्लिकेसनले सन् २००२ मा सर्वोत्तम नामक मासिक पत्रिका निकाल्थ्यो, जसमा विश्वभरिका मनोरञ्जनात्मक गतविविधि समेटिन्थे । पछि नेपाली महिलाको आवाजलाई पनि प्राथमिकता दिने नीति अनुरुप कान्तिपुर प्रकाशनले दुई वर्षपछि सर्वोत्तम नारी मासिक चलाउन थालेको थियो ।
नारी शसक्तिकरण, अधिकार, सुन्दरता, खाना, स्वास्थ्य र फेसन लगायतका विषय समेट्ने यो पत्रिका नेपाली महिला माझ लोकप्रिय थियो । यसमा महिला लेखकलाई प्राथमिकता दिइन्थ्यो ।
यो पत्रिका भारतको दार्जिलिङ र मिरिकमा पनि लोकप्रिय थियो ।
